Breytingar á gjafasæðispöntunum frá 2018

19. desember, 2017

Kaup á gjafasæði

Mikilvægt er að panta sæði tímanlega áður en meðferð hefst. Sendingar af gjafasæði koma einu sinni í mánuði, yfirleitt í byrjun hvers mánaðar.

Þegar pantað er frá European sperm bank er ferlið eftirfarandi:

  1. Farið inn á heimasíðu bankans gegnum hlekkinn: clinics.europeanspermbank/IVFReykjavík. Þar er svo hægt að skoða þar úrval sem er í boði hverju sinni og velja gjafa.
  2. Gengið frá pöntun og greiðslu á heimasíðu sæðisbankans.
  3. Sendingar frá bankanum berast okkur einu sinni í mánuði, þ.e. í fyrstu viku hvers mánaðar. Athugið að meðferð getur ekki hafist fyrr en gjafasæðið hefur borist til klíníkurinnar.
  4. Auk gjalds fyrir gjafasæði skv. gjaldskrá sæðisbankans bætist við verðið virðisaukaskattur (24,5%), sendingarkostnaður og umsýslugjald við komuna til landsins.
  5. Ef pantaður er fleiri en einn skammtur til landsins sem nota á í fyrirfram ákveðinni meðferð þarf að greiða geymslugjald fyrir geymslu á sýnum, kr 22.000.- á ári.
  6. Við kaup á gjafasæði í fyrsta sinn þarf einnig að greiða fyrir þungunarrétt (sjá hér að neðan).

Athugið að notaðar eru svokallaðar IUI einingar og því nauðsynlegt að sæðið sé til á því formi. Við sjáum svo um að taka á móti sendingunni og koma fyrir í frysti á klíníkinni.

Þungunarréttur (pregnancy slot)

Við notkun á gjafasæði er nauðsynlegt að tryggja sér svokallaðan þungunarrétt fyrir hvern sæðisgjafa. Það er eins konar trygging fyrir því að ekki geti fleiri en tvær fjölskyldur á Íslandi átt börn eftir sama gjafa. Við kaup á gjafasæði þarf því í upphafi að að greiða einnig fyrir þungunarrétt. Þegar þungunarréttur hefur verið tryggður er hægt að nota viðkomandi gjafasæði eins oft og þörf krefur. Ef barn verður til helst þungunarrétturinn og tryggt er að ekki verði til barn frá sama gjafa nema í mesta lagi í einni annarri fjölskyldu hér á landi. Ef meðferðir leiða ekki til fæðingar barns er hægt að skila þungunarréttinum og fá hann endurgreiddan.

ATH: Áríðandi er að panta gjafasæði tímanlega. Vakin er athygli á því að ekki er hægt að hefja meðferð nema sæðið sé komið í hús og búið sé að ganga frá greiðslu.

Ekki er unnt að taka á móti gjafasæði frá öðrum sæðisbönkum nema í sérstökum undantekningartilfellum.

Back